काठमाडौं । सरकारले समस्याग्रस्त सहकारी संस्थाका बचतकर्ताको एक अर्ब ५१ करोड ५३ लाख ३७ हजार रुपैयाँ फिर्ता गरेको छ । भूमि व्यवस्था, सहकारी तथा गरिबी निवारण मन्त्रालयले मंगलबार पत्रकार सम्मेलन गरेर एक लाखभन्दा कम बचत भएकाहरूको पूरै र बढी भएका ४३८ जनालाई पनि दामासाहीले राहत दिने काम गरिएको जनाएको हो ।
समस्याग्रस्त सहकारी व्यवस्थापन समितिमार्फत सरकारले बचतकर्ताको रकम फिर्ता गर्ने काम गरेको हो । भूमि व्यवस्था, सहकारीमन्त्री बलराम अधिकारीले मागदाबी गर्ने बचतकर्ताहरूमध्ये ६ हजार ५९३ जनाको रकम चुक्ता गरिएको जानकारी दिए ।
सरकारी तथ्यांकअनुसार, मागदाबी गर्ने बचतकर्ताको संख्या ६२ हजार ७६० छ । उनीहरूमध्ये ६,५९३ जनाको बचत रकम फिर्ता गरिएको हो । बाँकी ५६ हजार ६०५ जनाको बचत रकम सम्बन्धित सहकारीको पुँजी, भौतिक सम्पत्ति, लगानी गरेको ऋण असुलीको माध्यमबाट फिर्ता गराइने मन्त्रालयले जनाएको छ ।
मन्त्री अधिकारीले सहकारीका दोषी सबैलाई कारबाहीको दायरामा ल्याउने गरी सरकारले सहकारी सम्बन्धी ऐन संशोधन गर्न लागिएको पनि जानकारी दिए ।
