काठमाडौं । बार्सिलोनाले स्पेनिस ला लिगामा १२ खेल खेल्दा ४० गोल गरेको छ । आइतबार राति भएको क्याटलान डर्बीमा बार्सिलोनाले स्पान्योललाई ३–१ ले हरायो ।
बार्सिलोनाको जितमा डानी ओल्मोले दुई गोल गरे । एक गोल राफिन्हाको नाममा रह्यो । स्पान्योलको लागि जाभी पौडोले एक गोल फर्काएका हुन् ।
जितपछि बार्सिलोनाले शीर्ष स्थान कायम राखेको छ । १२ मध्ये ११ जित निकालेको बार्सिलोनाको ३३ अंक छ । बार्सिलोनाले एक खेल हार्दा ४० गोल गरेको छ । विपक्षीले ११ गोल गरेका छन् । बार्सिलोनासँग २९ गोलको अग्रता छ ।
२४ अंकसहित दोस्रो स्थानमा रहेका रियाल मड्रिडले एक खेल कम खेलेको छ । हारपछि १२ खेलबाट १० अंक जोडेको स्पान्योल तालिकाको १७औं स्थानमा छ ।
घरेलु ओलम्पिक मैदानमा ह्यान्सी फ्लिकको प्रशिक्षणमा रहेको बार्सिलोनाको लागि ओल्मोले १२औं मिनेटमै अग्रता बनाए । २३औं मिनेटमा राफिन्हाले गोल गरेका हुन् । ३१औं मिनेटमा पुनः ओल्मोले गोल गर्दा पहिलो हाफमै घरमा बार्सिलोनाले ३–० को अग्रता बनाएको हो । दोस्रो हाफमा जाभीले गोल गरेपछि स्पान्योललाई हारबाट बचाउन सकेनन् ।
राति नै भएको खेलमा प्रशिक्षक डिअगो सिमोनका छोरा जिउलिआनोेले गोल गरेपछि एट्लेटिको मड्रिडले लास पाल्मासविरुद्ध २–० को जित निकाल्यो ।
