काठमाडौं । उपप्रधानमन्त्री तथा गृहमन्त्री रवि लामिछानेविरुद्धको रिटमाथिको सुनुवाइ स्थगित भएको छ ।
रिटमाथिको सुनुवाइ स्थगित गर्न निवेदक अनुपम भट्टराईलेले निवेदन दिएकाले आज सुनुवाइ स्थगित गरिएको हो ।
लामिछानेलाई पदबाट निलम्बन गर्न माग गर्दै दायर भएको रिटको आजको सुनुवाइ सर्वोच्च अदालतका न्यायाधीश सुनिलकुमार पोखरेलको इजलासमा परेको थियो । सोही कारण उनले आजको सुनुवाइ स्थगित गर्न निवेदन दिएका थिए ।
अधिवक्ता भट्टराईले गृहमन्त्री लामिछाने पदमा रहेर सहकारी ठगीको छानबिन निष्पक्ष नहुने भनी निलम्बनको माग गर्दै सर्वोच्चमा रिट दायर गरेका थिए । लामिछानेविरुद्ध सहकारी ठगीको कुनै मुद्दा छैन भन्ने महान्यायाधिवक्ता कार्यालयको पत्र खारेज गर्न समेत उनले माग गरेका छन् ।
रिटमा महान्यायाधिवक्ता कार्यालय, महान्यायाधिवक्ता दिनमणि पोखरेल र गृहमन्त्री लामिछानेलाई विपक्षी बनाइएको छ ।
