वाशिङटन डीसी । न्युयोर्कमा ऐतिहासिक मुद्दामा दोषी ठहरिएपछि पनि राष्ट्रपतिको निर्वाचनका लागि पूर्व राष्ट्रपति डोनाल्ड ट्रम्पको अभियान जारी रहनेछ । ट्रम्पका एक वकिलले बीबीसीसँग यस्तो बताएका हुन् ।
२०१६ को चुनावी अभियान अघि पोर्न स्टार स्टर्मी डेनियललाई आफूहरूबिचको सम्बन्धबारे मुख नखुल्न पैसा दिएको र आफ्नो व्यवसायको बहिखातामा हेरफेर गरेको ३४ ओटा मुद्दामा अदालतले ट्रम्पलाई दोषी ठहर गरेको थियो । फौजदारी मुद्दामा दोषी ठहर हुने ट्रम्प पहिलो अमेरिकी राष्ट्रपति हुन् ।
ट्रम्पले भने यो मुद्दा राजनीतिक रूपमा प्रेरित भएको र अदालतमा धोखाघडी भएको बताएका छन् । ट्रम्प राजनीतिक र छनौट अभियोगको सिकार भएको ट्रम्पका वकिल एलिना हुब्बाले बीबीसीलाई बताएकी छिन् ।
म्यानहट्टनको अदालतमा ७ हप्ताको अदालती कारबाहीका क्रममा ट्रम्प ३४ ओटै आरोपमा दोषी ठहर भएका थिए । ट्रम्पलाई जुलाई ११ मा सजाय सुनाइनेछ । ट्रम्पले यस निर्णयविरुद्ध पुनरावेदन अदालतमा जाँदै छन् । ट्रम्प जेल गए पनि नोभेम्बरमा हुन लागेको राष्ट्रपतीय निर्वाचनमा आफ्नो उम्मेदवारी जारी राख्ने हब्बाले बताएका छिन् ।
