काठमाडौं । अमेरिकी अदालतले कोलम्बिया विश्वविद्यालयका एक विद्यार्थीलाई देश निकाला गर्न अनुमति दिएको छ ।
अमेरिकी एक न्यायाधीशले कोलम्बिया विश्वविद्यालयका विद्यार्थी महमुद खलिललाई देश निकाला गर्नसक्ने फैसला गरेका छन् ।
अध्यागमन अदालतको निर्णयको अर्थ खलिललाई तत्काल देशबाट निष्कासन गरिनेछ भन्ने होइन । न्यायाधीशले खलिलका वकिलहरूलाई यस आदेशविरुद्ध अपिल गर्न अप्रिल २३ सम्मको समय दिएका छन् ।
प्यालेस्टाइन समर्थकको विरोध प्रदर्शनमा भूमिका खेलेको आरोपमा खलिललाई गत महिना पक्राउ गरिएको थियो । खलिल मार्च ८ देखि लुइसियाना डिटेन्सन सेन्टरमा छन् ।
खलिलले आफ्नो गिरफ्तारी प्यालेस्टिनीहरूको अधिकारको लागि आवाज उठाएको परिणाम भएको बताएका छन् । खलिल संयुक्त राज्य अमेरिकाका कानुनी रूपमै स्थायी बासिन्दा हुन् ।
यद्यपि, अमेरिकी सरकारले शीतयुद्धकालीन अध्यागमन कानुनलाई अमेरिकी विदेश नीतिको हित विपरीत भएको उल्लेख गरेको छ । बीबीसी
