काठमाडौं । काठमाडौं । सिरहा जिल्ला अदालत परिसरमै मिटरब्याजी अभियुक्तले पीडीतलाई पिटेका छन् ।
मिटरब्याजी अभियुक्त श्याम निरौलाले दुई जना पीडित रौदी यादव र सुकुमारी साहलाई कुटेका हुन् ।
जिल्ला प्रशासन कार्यालयमा ३२ वटा मिटरब्याज विरुद्ध उजुरी परेका निरौलाले कुटपिट गरेपछि मिटरब्याज पीडितहरू रातभर जिल्ला प्रहरी कार्यालय अगाडि धर्ना बसेका थिए ।
निरौलालाई कारबाहीको माग गर्दै दिएको जाहेरी दर्ता गर्न प्रहरीले नमानेपछि रातभर धर्ना बसेको मिटरब्याज पीडित संघर्ष समितिका केन्द्रीय अध्यक्ष मनोज पासवानले जानकारी दिए ।
उनले प्रहरीले जाहेरी नलिएको र उल्टै निरौलालाई संरक्षण गरेको भन्दै धर्ना बस्न बाध्य भएको बताए ।
बिहीबार बिहान ७ बजे प्रहरीले मिटरब्याजी निरौला विरुद्ध जाहेरी लिएपछि धर्ना स्थगित गरेको उनले बताए ।
यद्दपि प्रहरीले पीडितहरू साँझतिर जाहेरी दिएकाले मुद्दा दर्ता आज गरिएको जिल्ला प्रहरी कार्यालय सिरहाले जनाएको छ।
