काठमाडौँ । भावी प्रधानन्यायाधीशका लागि न्याय परिषद्ले संवैधानिक परिषद्मा ६ जना न्यायाधीशको सूची पठाएको छ । परिषद्ले सर्वोच्चकी वरिष्ठतम् न्यायाधीश सपना प्रधान मल्ल, कुमार रेग्मी, हरिप्रसाद फुयाल, डा.मनोजकुमार शर्मा, डा.नहकुल सुवेदी र तिलप्रसाद श्रेष्ठको नाम सचिवालयमा पठाएको हो । न्याय परिषद्का एक सदस्यका अनुसार उनीहरुमध्येबाट संवैधानिक परिषद्ले एक जनाको नाम सिफारिस गर्ने छ ।
प्रधानन्यायाधीश प्रकाशमान सिंह राउतले ६५ वर्षे उमेर हदका कारण अवकाश पाउन लागेकाले यस्तो सिफारिस गरिएको हो । राउतले आउँदो चैत १८ गतेदेखि अवकाशमा पाउँदै छन् । त्यसअघि नै परिषद्ले ६ जना न्यायाधीशको रोष्टर पठाएको हो ।
संविधानको धारा १२९ मा नेपालको प्रधानन्यायाधीश तथा सर्वोच्च अदालतका न्यायाधीशको नियुक्ति र योग्यतासम्बन्धी व्यवस्था रहेको छ । उक्त व्यवस्थाको उपधारा २ अनुसार प्रधानन्यायाधीशको र न्याय परिषद्को सिफारिसका आधारमा संवैधानिक परिषद्को सिफारिसअनुसार सर्वोच्च अदालतका अन्य न्यायाधीशको नियुक्ति राष्ट्रपतिबाट हुनेछ ।
संवैधानिक परिषद्ले सिफारिस गरेपछि संसदीय सुनुवाइ हुन्छ । सुनुवाइबाट अनुमोदन भएपछि सर्वोच्चले नयाँ प्रधानन्यायाधीश पाउने छ । रोलक्रम अनुसार मल्ल वरीयतामा पहिलो नम्बरमा छिन् ।
